搞笑广州话口头禅之“叉烧”

我爱免费

作者：微信文章


老广开口埋口常日讲嘅“叉烧”，唔系“母夜叉发烧”或者“阿叉发烧”，而系“叉嚿肉去烧”。作为地道、著名嘅广东特色肉制品，叉烧通常由猪肉经过腌渍之后，挂喺特制嘅叉子（钢叉）上烧烤制成，成品多数呈红色，略带甜感，入口相当美味。

叉烧属广东烧味嘅一种（其它烧味还有烧鸭、烧鹅、烧猪、烧排骨、烧花肠等），美味秘诀系最紧要识得整色整水同掌握火候啱啱好。做法系将猪肉切好，先用糖、豉油、五香粉、料酒等调料腌制，穿在叉子上放在火上烧熟。烧时会在表面涂上红色嘅叉烧酱，所以色泽好红。靓嘅叉烧应该系肉质软嫩多汁、色泽鲜明、香味四溢。当中又以肥、瘦肉均衡为上佳（原材料用五花肉），称之为“半肥瘦”。烧腊橱窗前常见成品吊高卖，肥肉比较多嘅叫“肥叉”，净瘦肉叫“瘦叉”。



市井百姓嘅烟火生活，家常菜冇乜餸，好多时临时加餐，都好习惯出街就近去烧腊店、熟食档或者系濑粉铺“斩料”，“斩半只烧鹅”或者系“斩埋嚿叉烧”啊噉。拣叉烧考眼力，外焦内嫩，不老不柴，油光锃亮，满满肉香，睇见就流口水。斩叉烧考刀工，熟手师傅手起刀落就见刀法精湛，又快又准，片片削薄透亮齐整，装盒或上碟，再淋上烧味汁，真系香喷喷冇得顶。

叉烧，唔单止可以直接食用，仲可以用来制作其他美食同菜式，比如话：叉烧饭、叉烧包、叉烧酥等等。

其中，叉烧包就系广东地区具有代表性嘅特色点心之一，经年累月，源远流长，深受广大食客嘅欢迎。



都话“食在广州”啰，喺广东，早茶文化早已深入人心，成为岭南文化嘅重要象征，独特嘅饮食习惯承载着镌刻在骨子里嘅文化基因，系老广街头巷尾最鲜活嘅烟火气。钟意朝头早起身上茶楼，三五知己坐低饮杯茶食个包（一起喝茶吃点心），时至今日，有人仲会保留饮早茶嗜好，而后生仔女瞓到黄朝百晏嘅，就钟意“饮茶食饭直落，两餐合一餐”来解决医肚。

饮茶倾计，一边吹水，一边各式精致美味嘅“粥粉面饭”同点心就陆续上桌嘞。饿到叽哩咕噜嘅，就即刻来个叉烧米粉之类嘅。再点啲咩？唔好忘记粤式早茶“四大天王”啦，就系虾饺、干蒸烧卖、叉烧包、蛋挞啰。讲讲下，少唔得嘅，就系包点咯，每次都自然会点几笼包，趁热气腾腾掰开来食，嗯嗯，齿颊留香，心满意足。



你钟意食咩包啊？有叉烧包、生肉包、流沙包、莲蓉包、奶黄包、麦皮包、大包、餐包、馒头、花卷啊噉，应有尽有，任君选择。嗱嗱，叉烧包就绝对系好多大叔大妈嘅至爱啦，外形好认，尖端发酵蒸出来微裂现出肉馅嘅，咩料睇到啦，就系切成细细粒嘅叉烧，捞埋蚝油、生粉、叉烧酱呢啲调味料，馅料丰富有层次，口感咸甜肉香，食过返寻味。

广州话当中，叉烧包，好食，但好少用来闹人。而叉烧呢，就分分钟系骂人词汇嘞。



因为“叉烧”在粤语中除咗食品，仲含有贬义“愚蠢，肥胖”呢啲意思噶。若然你听见有人话边个边个“正叉烧！”可想而知，系骂人哋乜嘢呢？啲老窦老母火遮眼教训啲仔女嗰阵，周不时话嗰句：“生嚿叉烧好过生你！”意思即系话你啊，你鬼咁调皮百厌、鬼咁败家唔生性、鬼咁顶心杉包顶颈，话你连叉烧都不如，生块叉烧起码仲有得食过口瘾，生你屁用都没有！毫无价值。不过，呢个系习惯性长辈“发威”讲法，贬义嘅意思并唔系咁严重噶。



讲嘢精简嘅，就直接话“你个叉烧”、“你嚿叉烧”，诸如此类嘅说话出自父母长辈之口，表明“叉烧族”系属于依赖父母，但系又违背父母期望嘅一群人，无所事事，无所用心，忤逆反叛，比啃老族有过之而无不及。

另外，广州话中，“叉烧”仲有“夹在中间”嘅意思。例如，在排球比赛中，当球被一方扣球而另一方难以接网时，球就在中间，双方互不相让嘅情况下，广州话就叫“食叉烧”，意指双方都在争夺。

叉烧系烧味，但系我哋常日听见骂人嘅粗口，有“你卤味”（“你老母”嘅谐音，相当于去死或者滚），就并冇“你烧味”嗝啵。



（本文图片来自微信公众平台公共图片库，如有版权请告知删除。谢谢！）

作者简介：王小女子，一个从小就热爱文学和音乐的小女子，个人公众号：王小女子（gh-9abf8a3205fe）。

你可能还想看：

搞笑广州话口头禅之“爆石”

广州话：养唔熟

搞笑广州话顺口溜~溜

广州话：番鬼佬和番鬼嘢

广州话：广州亲戚，又食又拎

谢谢你的关注和支持

转发和推荐是最好的鼓励

长按以下二维码

可关注“王小女子”的公众号